مادام غدوة تتعدّى 58 سنة على بروتوكول 20 مارس 1956 ، برّا نتذكرو بالڨجمي الفصيح اش
ماعناتها :
ڨ …ڨومي ، ڨ … فلاّڨ
الڨومي ؟
هو القوّاد و البيّوع و الصبّايحي … الّي خدم عمرو الكل سيدو الباي و معاه خدم بو برطلة الرومي … عمرو الكل يا اصب للفرنسيس باخيّانو التوانسة و الا ادل في الجندرمي وين متخبين المجاهدين الي هزو السلاح في وجه الاستعمار …
وجا حبيب الامة والمجاهد الاكبر و من باب الواقعية و السماح على الي فات واحنا اولاد اليوم سامحهم و قبل حسب ما اتفق مع الفرنسيس موش باش ما اعاقبهمش بركة اما باش اعمّل علاهم …
الفلاّڨ ؟
كلمة طرابلسيّة في الاصل من ليبيا جات مع الي هاجرو لبلادنا من طرابلس … عندها معنى متاع ذم و معنى دلالي عالي و ناسها حفظتهم الذاكرة ومانساتهمش … كيفاش ؟
في الوقت الي كَبِّر بورڨيبة بالڨومية ، المجاهد الي قاوم وشد صحيح لاخر لحظة ورفض اسلّم سلاحه بين 54 و 1955 خاطر المجاهد ما ارنديش سلاحه للمستعمر و قال نستقلو ومن بعد ع الراس والعين دولتي هي الي نكب على راسها و نسلملها سلاحي ، ها المقاوم ولّى مبخوس ومحڨور و سماه سيد الاسياد اكا العام ” فلاّڨ” ، ماعناتها قُطْعي يسرڨ و يڨطع الطريق و افلّڨ في الجبل … و الڨومي ولاّ في ليلة ونهار بورڨيبي والعسّة ولّت على الي اعارض بورڨيبة و ضرب الهناشر و الاراضي والفيرمات … والفلاّڨ برغم الي تحڨر و تبخس و ما لحڨو حتى نصيب م الثروة و من متاع الدنيا ، كبر اسمو و علاّ شانو و الفلاّڨ ولاّت تساوي في المعنى متاعها المقاومين الأحرار و المجاهدين الكبار متاع ها البلاد …وغنّاية الخمسة الي لحڨو بالجرّة ملك الموت منك راجي الي تتغنّى بالمجاهد الأكبر الحقيقي الدغباجي ، سنين الله بقات موشومة في وجدان التوانسة …بالرغم الي بورڨيبة و الحاشية متاعو و الزباينة زيْفو التاريخ و خلقو منّ زعيمهم المجاهد الأكبر الأوحد …أما ذاكرتنا ما نسّاتش الدغباجي و الجربوع و في كل دشرة ظهر منها مقاوم الاّ واسمو محفور في ذاكرةاهلو …
الفلاّڨة هاذم و ها الڨومية من وقت دخول الجيش الفرانساوي عندهم جدود و الزوز توانسة اما كل واحد من بر ،الدم دم واحد اما متخالفين في الروح و في العقل و في الڨلب :
على جِدّة ما جو الفرنسيس ، كل حد بان على حقيقته ،
اڨول شاعر عامي ، تنسى اسمو ، اما تحفظ شعرو :
البَايْ بَاعِثْ عِليناَ إلُومْ ڨَالْ افرحو بِمَحالْ ولد الرُوم ْ
الباي بَاعْ الوطن بالتصْحِيحْ ماعاد فيه مِليح ْ
وِلِّي عِينوُ في الجَهَادْ اِصِيحْ
وفي تونس اليوم أحفاد للڨومية سمسارة على لون وكريمة من غير نسّب ولاّ حسّب لجدودهم البيوعة تفننو في الرخص و التلحيس للڨاوري ..ومن قبل حتى الثورة هوما من سفارة لسفارة و اليوم ماعاد شيء امْخبّي في النهار والڨايلة اسافرو لباريز و الاّ لواشنطن احاولو بجاه ربي ارضو علينا وارضو بنا ، و الي ما سافرش اقابل الرئيس الي اجي و يتفاوض مع سفير ها البلاد هذي و البلاد لخرى ، من غير حتى صفة في الدولة و كاينّا ولينا في تونسنا في سوق ودلاّل شكون يشري “هاو عميل للبيع ” …
وفي تونس زادة ثمّة برشة الي ينسبو رواحهم بعزّة وفُخرة لجدود الفلاڨة … وبالرغم الي السلاح ادور اليوم عند ناس غير ناسه ، ادور في يد ناس ماشي في بالهم اقاومو في الكفّار وهوما في الاصل لعبة بين ادين جماعة الاستعمار ، السلاح الي فيد اولاد الفلاڨة سلاح اقوى : سلاح التونسي الحر الّي اقاوم وما يستسلمّش لا يذبح ولا اقتّل ، سلاح الّي ثارو ضد الظلم والطغيان ، ثارو و ناضو ، فزّو و فزعو و ڨامو صوت واحد : بِسِبِيلْ المُحال كانْ مَازِلْناَ نَقْبُلو ها عِيشَة الذِل …و بِسِبيلْ المُحَالْ كَانْ نَرْجُعُو كِمَا كُنَّا قَبْلْ طحّين و قوادة و صبّة وعسّة و ركشة ولُبُّود و سكّات ولجّام … و تلڨاهم يحلفو ويتكتفو قولا وفعلا : و الله كنموتو الناس الكل …
اما كالعادة والعوّايد برشة ڨومية جدّد لابدين راكشين و بعد ماكانو موخرين في العركة ڨدمو و ڨالو احنا امّالي الثورة و ولّو يحلمو بنصيبهم في الثورة بعد ما صدعولنا روسنا وحكو باسم الشعب وحقو في الثروة … و علاّش لا ؟ مادام ها الثورة جابت واحد ولد ڨومي اليوم ولّى برتبة رئيس مؤقّت !!! وِلّي نِعْڨُدُو فيه النوارة هو بيدو اولّي مادد ايده ال بو برطلة و شادد الصف يستنى في بايتو اڨولك بالكشي تصادف و يختاره الشعب رئيس …
وهكاكة تونس لليوم بعد 58 سنة من بروتوكول 56 ، وبعد 3 سنين م الثورة مازالت في دوّامة بين الفلاّڨة و الڨومية … غاطسة للعنكوش في الديّونة و سقوطيّة الديّوثة الّي باعو البلاد ومستعدّين باش ابيعوها باش ثمّاش ما يقبلو بيه حاكم دائم …
وقتاش نستقلو بالحق و نولو أحرار في بلادنا بالفم والملاّ و ماعاد نشوفو لا فلاّڨة ولا ڨومية ، نشوفو ناس تحلم مع بعضها تبني ” وطن من نسج احلام ” ؟ وقتاش زعمة اتم ها المنامة ؟
________________
ولد زهرة ، نهار قبل 20 مارس 2014